Kókoshrísgrjón - karrýkjúklingur - rogan Josh - kormakjúklingur og þín eigin Garam Masala blanda:

Magn krydds er teygjanlegt. Takið sjálfstæða ákvörðun. Skeiðar eru alls ekki sléttfullar í þessum uppskriftum, miklu fremur kúfaðar. Um að gera að prófa sig áfram. Kryddin gefa bragð en chilí gerir réttinn sterkan.

Alvöru kókoshrísgrjón

4 bollar basmati hrísgrjón
6 bollar af köldu vatni
1 dós kókosmjólk
3-4 grænar kardimommur
2-3 cm löng kanilstöng
2-3 svört piparkorn
2-3 negulnaglar
1-2 tsk túrmerik
½ tsk chilí [má sleppa]
Lófafylli af kasjúhnetum

Fyllið fjóra bolla af góðum basmati hrísgrjónum, setjið í skál og skolið úr köldu vatni. Notið hendurnar og hrærið í. Sigtið vatnið frá og setjið hrísgrjónin í pott ásamt sex bollum af köldu vatni og einni dós af kókosmjólk. Hrærið. Grófsteytið í mortéli kanilstöng, svört piparkorn, kardimommur og negulnagla og búið til ykkar eigið masala [kryddblöndu] og blandið saman við hrísgrjónin með trésleif ásamt túrmeriki, chilí [má sleppa], kasjúhnetum og salti. Sjóðið við vægan hita. Hrísgrjónin eru tilbúin þegar vatnið er gufað upp.

Alvöru karrýkjúklingur

3-4 laukar
3-4 hvítlauksgeirar
2 tsk engifer
3-4 tsk kóríander
1-2 tsk túrmerik
½-1 tsk chilí
2 tsk kúmín
500 gr. beinlaus kjúklingur
[Auðvitað er hægt að nota kjúkling á beini og er það upprunalegra – en þá þarf að fjölga grömmunum og elda lengur]
1-2 grænar paprikur
4 tómatar
5 grænar kardemommur
2-3 cm löng kanilstöng
5 negulnaglar
Vatn og salt
Góð olía til steikingar, ólívuolía er gæði
1 tsk garam masala, kóríanderlauf eða steinselja til skrauts

Smáttskerið hvítlaukinn og blandið honum saman við engifer, salt og olíu. Nuddið saman við kjúklingabitana og geymið í að minnsta kosti eina klst í skál. Maukið tómatana og skerið ferskt kóríander í smátt. Skerið paprikuna í fallega bita. Steytið saman í mortéli kanilstangir, negulnagla og grænar kardimommur. Steikið í olíu í um hálfa mínútu og gætið vel að brenna ekki. Blandið saman við smáttskornum lauknum og steikið uns hann er gullinn. Setjið kryddlegna kjúklingabitana út í og steikið áfram. Látið snarka í og finnið ilminn, hrærið með trésleif, látið malla. Blandið nú saman við túrmeriki, kóríander, kúmíni og rauðu chili og hrærið vel. Þá er tómatmaukinu bætt út í. Eldið við háan hita í 5 mínútur. Bætið út í paprikunni og 1-2 bollum af vatni og hitið að suðu. Setjið lok á og látið malla þar til tilbúið.
Smakkið réttinn til, með salti, krafti, örlitlu af sætuefni ef þið eruð veik fyrir þeim. Passið ykkur samt á því að gera ekki of mikið af slíku. Stráið yfir kóríander laufum eða steinselju og garam masala.
Borið fram með góðum basmati hrísgrjónum og léttu salati.

Alvöru Rogan Josh

6-7 negulnaglar
5 cm löng kanelstöng
5-6 svört piparkorn
4 grænar kardemommur
½-1 tsk chilí
500 gr. beinlaust lambakjöt
1-2 tsk engifer
2-3 tsk kóríander
2 tsk fennel
Vatn og salt/kraftur
1 rauð eða græn paprika
Kóríanderlauf eða steinselja til skrauts
Góð olía til steikingar, ólívuolía er gæði
1 dós jógúrt

Skerið lambakjötið í hæfilega bita. Steytið saman í mortéli piparkorn, kanilstangir, negulnagla og grænar kardimommur. Steikið í olíu í um hálfa mínútu og gætið vel að brenna ekki. Blandið kjötbitunum saman við og eldið við miðlungshita í 5-10 mínútur, hrærið stöðugt í þar til kjötið hefur tekið á sig rauðbrúnan lit. Hellið svolitlu af vatni yfir og mallið áfram við vægan hita í 20 mínútur [fer reyndar eftir stærð bitanna]. Hrærið reglulega í. Bætið við chili, steyttu fennel, engifer, kóríander og smakkið réttinn til með salti eða krafti. Passið ykkur samt á því að gera ekki of mikið af slíku. Salt/kraftur getur dregið mjög úr hinu „rétta” bragði. Hrærið jógúrt saman við tvo bolla af vatni og hellið yfir kjötið. Látið réttinn malla undir loki þar til kjötið er orðið mjúkt og hefur dregið í sig ilm og bragð kryddsins. Hrærið í af og til.
Myndrænt séð getur verið sniðugt að strá grænu yfir: söxuðum kóríanderlaufum eða steinselju, jafnvel skessujurt úr garðinum eða birkilaufum frá síðasta sumri.
Borið fram með góðum basmati hrísgrjónum og léttu salati.

Alvöru kormakjúklingur

2-3 laukar
3-4 hvítlauksgeirar
2-3 tsk engifer
½ tsk chilí
2-3 tsk kóríander
2-3 tsk garam masala
1 tsk túrmerik
1 dós kókosmjólk
Salt, kjúklingakraftur ef vill
Vatn
70 g maukaðar kasjúhnetur
500 gr. beinlaus kjúklingur
[Auðvitað er hægt að nota kjúkling á beini og er það upprunalegra – en þá þarf að fjölga grömmunum og elda lengur]
Góð olía til steikingar, ólívuolía er gæði
Lítil dós jógúrt, rjómi eða mjólk
Kóríanderlauf eða steinselja til skrauts
Jafnvel ein rauð/græn paprika

Skerið hvítlaukinn í smátt og blandið honum saman með engifer, salti og olíu við kjúklingabitana. Geymið að minnsta kosti í eina klst. Hitið olíuna vel og skerið laukinn, steikið þangað til gylltur. Setjið kryddlegna kjúklingabitana út í og steikið áfram. Látið snarka í og finnið ilminn, hrærið með trésleif, látið malla. Skvettið mjólkurafurðum út í, ef notuð er jógúrt er henni blandað varlega saman við, ásamt kasjúhnetunum. Hrærið. Kryddið nú réttinn af tilfinningu, kóríander, chilí, garam masala, túrmerik. Gefið hverju kryddi rými og tíma. Blandið saman við dós af kókósmjólk. Hrærið áfram varlega, eldið bitana í gegn, smakkið réttinn til, með salti, krafti, örlitlu af sætuefni ef þið eruð veik fyrir þeim. Passið ykkur samt á því að gera ekki of mikið af slíku.
Myndrænt séð getur verið sniðugt að eiga smáttskorna papriku, græna eða rauða og blanda henni eða hluta hennar saman við, einnig að strá grænu yfir: söxuðum kóríanderlaufum eða steinselju, jafnvel skessujurt úr garðinum eða birkilaufum frá síðasta sumri.
Borið fram með góðum basmati hrísgrjónum og léttu salati.

Alvöru Garam Masala [sterk blanda]
Búðu til þína eigin blöndu

50 gr. koríanderfræ
50 gr. kúminfræ
20 grænar kardimommur
10 kanilstangir - um það bil 2,5 cm langar
2 matskeiðar negull
10 svartar kardimommur
1 matskeið svört piparkorn

Blandið kryddinu saman, setjið á bökunarplötu og ristið í stuttan tíma neðarlega í ofni á 110 gráðu hita í um það bil 5 mínútur. Setjið það síðan í mixer eða blandara og myljið niður í smátt. Þetta getur tekið smá tíma. Sigtið frá það sem ekki mylst niður. Tilvalið að setja í glerkrukkur.